انتقد ديزي دروس مغني الراب بعض لاعبي الوداد الرياضي، مباشرة بعد نهاية المباراة التي جمعت بين الفريق الأحمر والفتح الرياضي، يوم أمس الأحد، برسم الجولة 21 من منافسات البطولة الوطنية الاحترافية.
وكتب ديزي دروس تعليقا على صفحة الوداد الرسمية على الفايس بوك أثار إعجاب أنصار الوداد.
وفي ما يلي تعليق ديزي دروس:
دابا بغيت نفهم:
إنسان خدمتو هي الكورة، هي الاهتمام الوحيد لي عندو فالحياة. باش تلعب فالوداد اليوم هذا كيعني أنك ضمنتي مستقبلك ومستقبل ولادك، عايش حياة مستقرة مادياً بل أنك من علّية المجتمع، يعني من اللخر انت مرتاح نفسيا و متحرر من ضغوط الحياة لأنك كتاكل الخبز من حاجة لي فيها متعة كبيرة و معظم الشباب ماكرهوش هاد الرفاهية لي عايشها نتا. هادشي كامل يعني أن تركيزك الوحيد واهتمامك الأوحد فالدنيا هو “البالون”.
لعاب لي ماكيعرف يطلق باص، مايعرف يكونطرولي لبالون، مايعرف يسونطري، مايعرف يدريبلي، ما يعرف يكادري للشبكة، مايعرف يضرب بالراس.. اشنو كيعرف يدير؟ يجري؟؟ الركض ماكيحتاجش مهارات.. يكوڤري؟؟ الدّافيع ماكيتطلبش براعة.. هادو غير الأساسيات لا بغيتي تلعب كرة القدم (بلا ماندخلو فالأمور الطكتيكية و واش كتعرف توقف فالتيران و ديپلاصا وتعرف ايمتا تطلع وايمتا تهبط..). ما كنآمنش بشي حاجة سميتها لاعب كيمر من فترة فراغ، وحتى إذا قبلنا بهاد العذر الواهي فكاين شي لعابة حياتهم كاملة دازت فراغ.. الأرقام الفردية للاعبين فالمغرب أرقام مخجلة وتبعث على السخرية. مستوى الكرة فالمغرب ما دون المتوسط و بلا ما نبقاو نكذبو على ريوسنا.
