لم يقتصر تألق سيدات الجيش الملكي على التتويج بلقب عصبة أبطال إفريقيا، بعد الفوز المستحق على ماميلودي صنداونز الجنوب إفريقي بثلاثة أهداف لهدف، بل امتد حتى لمنصات الجوائز الفردية، اللي أكدات السيطرة الكاملة ديال العسكريات على المنافسة القارية.
وهكذا، توجات الحارسة المخضرمة خديجة الرميشي بجائزة أفضل حارسة مرمى فالدورة، مكافأة ليها على المستويات الكبيرة اللي قدمات، و فين كانت هي السد المنيع اللي حما عرين الفريق، خصوصا فالماتشات الصعاب ديال نصف النهائي والفينال.
ومن تما، خطفات المتألقة إيمان توريس جائزة هدافة المنافسة، بعدما بصمات على حضور هجومي قوي طول البطولة، وزادت أكداتها فالنهائي بثنائية فالشباك ديال صنداونز، كانت هي اللي قتلات الماتش.
أما القائدة غزلان الشباك، فتوجات بجائزة أفضل لاعبة فالبطولة، وهي جائزة مستحقة للنجمة اللي كانت هي المحرك ديال الفريق كامل، لا بالتمريرات الحاسمة ولا بالقيادة داخل التيران، وقادت الجيش للنجمة الثالثة.
وبهاد الشكل، بينو لاعبات الجيش الملكي أن السيطرة المغربية فإفريقيا ما كانتش غير جماعية، ولكن حتى فردية، فليلة إفريقية ببصمة عسكرية خالصة.